Jon Kortazar eta Javier Rojoren artikulu batekin ematen digu ongietorria Ínsulak. Besteak beste, 2000-2012 urte bitartean euskal eleberriak izandako bilakaera aztertzen da bertan. Kortazar eta Rojok aurkezten duten beste artikulu bat XXI. mendeko Euskal poesiagintzari buruzkoa da; garai horretako euskal poeta eta poesia lanek izan duten gorakada aipatzen dute hainbat argitalpen gogora ekarriz, horien artean Kirmen Uriberen "Bitartean heldu eskutik" liburua.

Esatekoa da alean hainbat pertsonek parte hartu dutela; horien artean Alvaro Ravelli, narratibari buruzko artikulu batekin. Ravellik Eider Rodrígezen presentzia aipatzen du, gaur egungo euskal literaturan idazle interesgarrienetako bat dela esanez. Narratibari begira ere, Amaia Serrano Mariezkurrena eta Mariela Sánchezen "Narrativa vasca y memoria" artikulua ikus dezakegu.

Aldizkarian Bernardo Atxaga, Anjel Lertxundi eta Ramon Saizarbitoria izan dira protagonistetako batzuk. Esaterako  Martutene liburuari buruzko Iñaki Aldekoaren artikuluak erakusten digun bezala. Bestalde "Hacia la feminización de la literatura infantil" izenburua daraman Xabier Etxanizen artikuluak euskal idazleek haur eta gazteentzako literaturan egin duten lanari buruz hitz egiten digu. Literatura mota honek pertsonen formakuntzan oso paper garrantzitsua jokatzen duela azaltzen du. Izan ere, egileek pertsonen garapenerako baliagarriak diren gaiak jorratu izan direla uste du Etxanizek.

Horretaz gain, literatura dramatikoa ere aztergai da Ínsulan; bereziki mota honetako lanek duten produkzio txikia eta agerpen urria azaltzen da. José Manuel López Gaseniren eskutik euskal literatura itzulia ere jorratu da aldizkarian. Gainera, Paulo Kortazar, Joseba Gabilondo eta Iratxe Esparzaren lanak ere eskaintzen dira.