Konputagailuen programazioan lehenengo pausoak egin nahi dituenarentzat sortu dugu liburu hau. Oinarrizko kontzeptuak lantzen dira ariketen bidez: aginduak, kontrol-egiturak, oinarrizko datu-egiturak, eta azpiprogramen erazagupena eta erabilpena.
Mundu honetara lehenengo aldiz hurbiltzen denarentzat ez da egokiena zuzenean programazio-lengoaia bat ikastea. Askoz egokiagoa da programazio-lengoaia agintzaile guztiek konpartitzen dituzten kontzeptuak ezagutzea, eta abiapuntu horretatik gero programa idaztea lengoaia bat erabiliz. Euskaraz erraz irakurtzen diren algoritmoak asmatu beharko ditu ikasleak kontzeptu komun horiek lantzeko, beti ere, programazio-lengoaien sintaxi-arau estuak alboratuz.