Egileak Eneritz Anakabe Iturriaga, Sonia Arrasate Gil, Gorka Bueno Mendieta, Fernando Mijangos Ugarte eta Estibaliz Olivares Esteban dira. Guztiak kimikariak edo ingeniariak, eta gehienak unibertsitateko irakasleak, aski ezagunak dira euren jakintza-arloan. 

Kimikaren Nazioarteko Urtea dela aprobetxatuz, ikastaro bat eman dute Eibarren udako ikastaroen baitan. Bertan liburuaren tesia eta ondorioak aurkeztu dituzte. Alde batetik, muntaia esperimentala egin dute: Biodiesela lortu daitekeen sukaldeko olioarekin frogatzeko.  Bestetik, adibide praktikoen bidez, liburuaren nondik norakoak, galderak eta zalantzak azaldu dituzte: zenbat olio erabilia batzen da Eibarren? Zenbat batu beharko zen? Zer egin ahal dugu bilketa eraginkorragoa izateko?

Zientziako gaiak zailak eta ulergaitzak iruditu arren, liburu honen helburua irudi edo sentimendu hori ezabatzea da. Horrela, modu erraz, praktiko eta ulergarri batean zientzia, kasu honetan kimika, denoi hurbiltzea da. Beraz, aurreiritziak alde batera utzi eta zientziaren munduan modu erraz eta adibide praktikoekin sartzeko aukera eder hau aprobetxatu.