Maiz aipatua eta laudatua ohi den arren, gutxi dira oraindik Axularren Gero liburua irakurtzera ausartzen direnak, handiak baitira hura begietaratzeko eragozpenak, eta are handiagoak, nonbait, egungo irakurlearen errealitatetik atzemandako urruntasun tematiko, kronologiko eta linguistikoak.
Agerikoa zen, beraz, irakurbideak erraztu behar zitzaizkiola Gerori irakurleengana iritsiko bazen, hau da, ohi baino soineko erakargarriagoan bildua eta egungo euskara hedatuenetik hurbil paratua kaleratu behar zela ezinbestean.
Betiere Axularren mintzairaren sena gordez, bada, hamaika puntada berri eman izan zaizkio liburuari: euskara estandarrera ekarri dira haren ortografia eta lexiko gehiena; aditz batua erabili da bertsio berrian; neutralizatu egin dira euskara hedatuenean erabiltzen ez diren moldeak; jatorrizko puntuatze-sistema ere egokitu da ahal izan denetan; testua arinago eta mamia ageriago aterako zirelakoan, aipuak-eta solas-ereduen arabera taxutu dira; zuzendu eta eguneratu egin dira hainbat eta hainbat aipuren erreferentziak, etab.
Irakurleak berak egiaztatu beharko du orain zenbateraino duen baliagarri Geron barneratzeko eskaintzen zaion gonbit berria.
Hiztegiaren arabera, buruxkak 'galburu edo garau mortsak' dira. Era berean, izenburu horixe jarri zion 1910. urtean Jean Etxepare medikuak bere idazki bildumari.
Etxepare medikua (Jean Etxepare Bidegorri, 1877-1935) euskal idazle bikaina izan zen, laikoa, europar korronte berriei irekia eta arlo zabalei hedatua: kazetaritza, literatura, filosofia, zientzia...
P. Xarriton Buruxkak eta Etxepareren beste obra batzuk zein eskutitzak argitaratzeaz arduratu da, eta berriki, K. Altonagak zientziaren historiari lotutako Etxepareren biografia bat kaleratu du.
Aitzindari hura gogoan, UEUk bere liburutegi digitalari Buruxkak izena jarri dio
