Bidez bide hausnarrean liburuan hiru zati edo atal bereiz daitezke. Lehenengoan, zenbait auzi filosofiko jorratzen dira. Fokupean jartzen dira, besteak beste, zenbait artelanen edo fikzio-lanen ustezko izaera immorala, narrazio historikoen izaera, jarrera negazionistaren eta kritikoaren arteko harremana edo gizarte-aldaketei begira filosofian egin diren proposamen zehatz batzuen arteko eztabaida (Rousseau-Hume eztabaida). Gai horietako batzuei lehenengo hurbilketa bat egin zien egileak Gogoeta-bide irekiak edo Zientziaren argi-itzalak liburuetan.
Bigarren zatian, egileak aurkezten ditu, filosofiarako sarrera bati begira, pentsamendu feministak egin dituen zenbait ekarpen. Besteak beste, lekukotasunari, metafisikari, ezagutzaren teoriari, zientziaren edo artearen filosofiari egindako zenbait ekarpen jorratzen dira. Estereotipoen epistemologia, metafisika eta etikaren inguruko kezkak ere aztertzen dira. Egilearen iritzian, bigarren zati hau berak idatzitako Filosofiarako sarrera bat eta Zertaz dihardu filosofiak? liburuak osatzera dator.
Azkenik, hirugarren zatian, egilearengan eragina izan duten egile batzuen ideiak eta pentsamendua aurkezten ditu. David Hume, Bertrand Russell eta Susan Haack izango dira zati horretako protagonista nagusiak.
Liburuko izenburuak gogora ekartzen du bertan agertzen diren ideia asko, literalki, ibilian piztu edo landu direla.
Hiztegiaren arabera, buruxkak 'galburu edo garau mortsak' dira. Era berean, izenburu horixe jarri zion 1910. urtean Jean Etxepare medikuak bere idazki bildumari.
Etxepare medikua (Jean Etxepare Bidegorri, 1877-1935) euskal idazle bikaina izan zen, laikoa, europar korronte berriei irekia eta arlo zabalei hedatua: kazetaritza, literatura, filosofia, zientzia...
P. Xarriton Buruxkak eta Etxepareren beste obra batzuk zein eskutitzak argitaratzeaz arduratu da, eta berriki, K. Altonagak zientziaren historiari lotutako Etxepareren biografia bat kaleratu du.
Aitzindari hura gogoan, UEUk bere liburutegi digitalari Buruxkak izena jarri dio
