Esku artean duzun liburuaren jatorria uztaileko astebete sargoritsu batean kokatu behar da, Iruñean, Udako Euskal Unibertsitatearen Literatura Sailak antolatu zuen "Euskal haur eta gazte literatura" ikastaroan, alegia. Bertan emandako hitzaldietatik bat edo beste liburutik kanpora geratu da, haietan alde praktikoak zuen nagusigoak hala eskatuta. Pako Aristik, Iruñeakoan zuzenean parte hartzerik izan ez bazuen ere, argitalpenerako bere ekarpena erantsi nahi izan du. Xabier Etxanizen bigarren artikuluak, berriz, UEUren Gasteizko Ihardunaldietarako prestaturiko hitzaldia jasotzen du.

Ikuspegi orokorrak eta pertsonalak, alde teorikoak eta esperientziazkoak biltzen ditu artikulu bilduma honek. Garaiotan sarri hain korapilatsua gertatzen den gar honen inguruan, argigarri izan bitez azterketa saiook.