Artikulu ezberdinez osatutako liburu honetan oraindik martxan dagoen prozesu historiko batetaz hitz egin nahi izan dugu: euskal industrializazioaz, hain zuzen ere. Gure industrializazio prozesu honek, dudarik gabe, ibilbide bihurria izan du, XIX. mendetik gaurdaino. Eta ibilbide hau ezin dugu ulertu kapitalista deritzogun sistema ekonomikoaren bilakaeraren testuinguruan sartzen ez badugu. Hortaz, liburu hau lau atal nagusitan banatu dugu: lehenengoan, kapitalismoaren ezaugarriak eta batipat kapitalismoaren krisiei buruz dakiguna azaltzen saiatzen gara; bigarrenean, euskal industrializazioaren historia bera dugu aztergai; hirugarrenean, gaur egun euskal industriak jasaten duen krisiaren oinarriak eta ondorioak azaleratzen saiatzen gara; eta, laugarrenean, aurrekoarekin loturik, krisi honek lan-merkatuan eragin dituen aldaketen ezaugarriak jorratzen ditugu. Udako Euskal Unibertsitateak argitaratutako lan apal honetan historialari, geografo eta ekonomilariz osatutako talde bat gai hauei buruzko ikuspegi anitz bat eskaintzen saiatu da.