Liburu hau euskaldun miresgarri bati egiten diogun omenaldia da, maitasun handienarekin gauzatua. Lagunek lagunari opatua, adiskideari adiskideek eskainia.
Euskal Herriak asko zor dio Txillardegiri, eta, esan beharrik ez dago, liburu honekin ezin dugu zor hori estali. Gehiegi baita Txillardegi. Gizon polifazetikoa: ingeniaria, politikaria, hizkuntzalaria, euskararen aldeko militante nekaezina, abertzalea txapeleraino...
Liburu honetako zenbait artikuluk Txillardegi berari buruz dihardute.
Gainerakoek hainbat diziplina ukitzen dituzte (hizkuntzalaritza, psikologia, ekonomia, filosofia...). Ipuin bat ere bada tartean. Azken finean, guztiek dute ezaugarri bera: egileek hurbiletik idazten dute, gure Jose Luisen gorazarretan.