Euskal literatura eta kulturari generotik nahiz gorputzetik behatu nahi izan zaie UEUk argitaratutako Gorputza eta generoa: teoria, didaktika eta esperientziak liburuan. Euskal kulturgintzan aritzen diren hamaika emakumeen esperientziatik abiatuta osatu dute liburua; Gema Lasarte UPV/EHUko irakaslea da horietako bat.

Psikologian doktorea da Izarne Lizaso eta Garapen biologikoa eta kognitiboa bizi-zikloan izeneko liburu bat argitaratu zuen UEUrekin iaz. Egun irakasle lanetan dihardu UPV/EHUko Psikologia Fakultatean. Horretaz aparte, ondoko bi ikerketa lanetan dabil murgilduta: batetik, adinekoen eta gazteen kategoria semantikoak ikertzen dabil, eta bestetik, helduaro goiztiarraren inguruan, Sevillako Unibertsitatearekin batera.

Uztaroko azken aleko artikuluetako baten egilea da Anne Marie Lagarde. Bertan, «Parekidetasuna eta sexu-identitateen eraketa euskal artzain-nekazari jendartean» izeneko ekarpena egin du. Xiberotarra da Anne Marie, Hizkuntza Modernoetan lizentziatua eta irakasle izateko egiaztagiria atera zuen gaztea zenean. Ondoren, psikologian lizentziatu eta psikologia sozialean espezializatu. 2000. urtean doktore-tesia egin zuen euskaldunen psikologia eta sexuen simetria aztertuz.

Anartz Ormaza Aldiri aldizkariaren azken zenbakiaren arduraduna izan da Inhar Agirrezabalekin batera. Lanbidez arkitektua da, argazkilari pasioz, eta bere bulegoa izateaz aparte, UEUko arkitektura sailburua ere bada. Horretaz gain, euskal dantzen irakaslea da Deustuko Unibertsitatean eta umeentzako arkitektura tailerrak ematen ditu Bilboko Guggenheim museoan.