Automatismoak eta kontrola egungo eta etorkizuneko apustu direla diote Ingeneriaritzan doktore diren Haritza Camblongek, Nora Barrosok eta Aitzol Ezeizak

Eguneroko jarduerak eta ekintzak erraztea dute helburu automazizazioek eta kontrolak. Eta hori hala, Haritza Camblong (Baiona, 1972), Nora Barroso (Errenteria, Gipuzkoa, 1978) eta Aitzol Ezeiza (Donostia, 1975) Ingeniaritzan doktoreek uste dute arlo horretako egungo erronkarik handiena gailu eta zerbitzu guztiak edonork ahalik eta modu errazenean eta erosoenean erabiltzea dela.

Automatismoak eta kontrola liburua argitaratu berri dute UEUrekin eta Elhuyar Fundazioarekin elkarlanean. UPV/EHUn irakasle lanetan dabiltza egun hirurak, eta irakasle ikuspuntutik ikasleek automatismoen eta kontrolen inguruan zituzten hutsuneak asetzeko erabaki zuten liburua idaztea, betiere euskal ikasleentzat tresna erabilgarria izan dadin.

Fisioterapia lantzen duten euskarazko liburu bakanetako bat argitaratu du Loitzun Izaolak. Paziente baten aurrean egotean, diagnostiko zehatz bat egitea funtsezkoa dela deritzo, diagnostiko horretan huts eginez gero, tratamenduak ez baitu balio. Horretarako tresna bat eskaintzea zuen helburu, eta halaxe argitaratu du liburua UEUrekin.

Muskulu, arteria, hezurdura eta bestelako alderdiak ondo menperatzen ditu Loitzun Izaola fisioterapeutak (Bilbo, 1981). Bartzelonako Ramon Llull Unibertsitatean diplomatu zen Fisioterapian, eta beti ikasteko zerbait dagoela jakinda, orain bi urte Madrileko Unibertsitate Europarrean Fisioterapian graduatu zen eta egun “Aktibitate Fisikoa eta Osasuna” izeneko masterra ari da ikasten Sevillako Pablo Olavide Unibertsitatean.

Ikerketaren bat edo beste ere egin du, baina nahiago du oraindik xehetasunik ez eman. Nolanahi ere, fisioterapiak ere euskarazko tresnak behar zituela ikusita, Neuromuskulueskeletikoen proba diagonistikoen eskuliburua izeneko liburua argitaratu du. Azalpen teorikoak ematen ditu liburuan, baina betiere egitura praktiko bati jarraiki.

Eskutik hartuta egin dute ibilbide profesionala Aitor Aritzeta eta Goretti Soroa psikologoek emozioekin eta gaitasun sozioemozionalekin. Garapen pertsonalean bakarrik ez, kulturalean ere eragina dutela diote.

Emoziorik gabe, bizirautea zaila delakoan daude UPV/EHUn lizentziatutako Aitor Aritzeta eta Goretti Soroa psikologoak. Emozioak eta gaitasun sozioemozionalak eskuliburua argitaratu dute UEUrekin horren aitzakian, norberak bere emozioak gara ditzan. Etenik gabeko ikerkuntza da antza emozioena. Hori horrela, ikerketa-lerro berriak dituzte irekita, taldeko adimen emozionala aztertzeko tresna batzuk sortu ahal izateko. Izan ere, emozioak osotasunean ulertzeko, eragin kulturala aztertzea funtsezkoa omen da.